Blogak

Lagunarteko plana dugu zuretzat. Txalaparta jotzen ikasi nahi baduzu, orain duzu aukera. Albisten honi atxikita doan fitxategian dituzu zehaztapenak.

Txalaparta jotzen ikasteko hastapeneko ikastaroa emango dugu otsailaren 24an, eta martxoaren 3an, 10ean eta 17an.

Sakontzeko ikastaroa, berriz, apirilaren 28an, eta maiatzaren 5ean, 12an eta 19an izango da.

TOBERA Musika-eskolako Zuzendaritza-batzordean ordezkari izango diren kideak hautatzeko aukera izango dute laster ikasleek eta familiek. Hain zuzen ere, urtarrilaren 27an, osteguna, izango dute aukera botoa ematera hurbiltzeko, arratsaldeko 18:00ak eta 20:00 bitarte, Zegamako eta Segurako kultura-etxeetan. Zeraingo familien kasuan, urtarrilaren 27ko arratsaldeko 18:00ak baino lehenago, Zeraingo zuzendaritzakideari entregatuta ere egin ahal izango dute, hala egitea kultura-etxeetara joatea baino erosoagoa balitzaie.

TOBERA Musika-eskolaren eskutik, Zegaman izan ziren aurten beste behin 3 Errege Magoak. 2022an desfile eta guzti sartu ziren herrian Errege Magoak. Iaz, pandemiagatik, geldirik egin zitzaien ongi etorria Erregeei, patio estalian eta aurretiaz txanda hartuta, familia-unitateak elkarren artean nahastu gabe.  Aurten, ordea, Kabalgata ia ohiko eran egiteko modua izan zen.

Seguran, Zegaman, Zerainen eta Mutiloan musikako eta euskal dantzatako eskolak ematen jarraitu ahal izateko, Orkliren diru-laguntza jaso berri du beste urte batez TOBERAk. Orkli berokuntzarako, etxeko ur berorako, ur-beroketarako eta etxetresna elektrikoetarako osagaiak fabrikatzen eta saltzen dituen enpresa da, eta bere egoitza soziala Ordizian dago. Eskerrik asko!

Osasunaren zaintza eta musika-jaialdi handia egitea bateragarri izan dira TOBERArentzat. Zegamako gimnasioan ospatu dugu aurten Santa Zezilia, azaroaren 18an, aurrez aurre iaz egiterik izan gabe egon ondoren. Jaialdi jendetsua izan da; ikasleak eta herritarrak gogotsu. 21 pieza eskaini dituzte gure ikasleek, 18:30ean hasitako emanaldian. Eguneko argazkiak ikusi nahi badituzu, sartu hemen:

https://photos.app.goo.gl/QNDHbFEhUBdkUoEc9

Musika-hizkuntzako ikasleen familiekin aurkezpen-bilerak egingo ditu TOBERA Musika-eskolak urriaren 25ean, arratsaldeko 16:30ean, Zegamako Jabier Otaegi kultura-etxeko musika-hizkuntzako gelan (Oria aretoan) eta biharamunean, urriaren 26an, arratsaldeko 18:00etan, Segurako kultura-etxeko areto nagusian.

Zegaman eskolak hartzen dituzten ikasleen familientzat eta Zerainen nahiz Seguran hartzen dituztenentzat izango dira bilera hauek, hurrenez hurren, nahiz eta, hobeto baletorkio norbaiti, bereaz besteko herriko bilerara joateko aukera baduen.

TOBERA Musika-eskolak abian du 2021/2022 ikasturtea. Mutiloako, Segurako, Zegamako eta Zeraingo musika- eta dantza-eskolak 35. ikasturtea du aurtengoa. 2021/2022 ikasturtea inoizko beteen etorri zaio TOBERAri: aspaldi-aspaldiko ikasle-kopuru gehien eta matrikula-kopuru gehien dugu oraintxe. Ikasturte segurua izango da aurtengoa ere; COVID-19aren aurrean ikasleen eta langileen osasuna zaintzeko kontingentzia-plan zehatza dugu egina.

Ekainaren 21ean eta 22an TOBERA Musika- eta Dantza-eskolako ikasleek egindako jendaurreko saioak erakutsi dute zuzeneko musika bezalakorik ez dagoela, ez musikarientzat eurentzat, ez publikoarentzat. Jendeak bikain erantzun die musika-eskolatik egindako deialdiei, eta aforoak erabat bete dira. Segurtasuna zainduta betiere, belaunaldi desberdinetako kideak elkartu dira musika egiteko, Zerainen eta Seguran. Arrakastatsu bietan.

Ekainaren 21ean, Musikaren Nazioarteko Eguna izanik, TOBERAko ikasleek emanaldia eskainiko dute Zerainen 18:30ean, ZerainLab elkartearekin lankidetzan. San Blas ermitaren inguruan izango da; eguraldi txarrarekin, eliza-atarian.

Hurrengo egunean, 22an, Zegamako patio estalian izango da kontzertua, 19:00etan. Covid-19a dela eta, tokia aurrez hartzea ezinbestekoa izango da (doan). Horretarako, deitu Zegamako udaletxera 22a baino lehenago.