segura

Urte asko dira TOBERA Musika-eskolak Elkartruke-zikloa hasi zuenetik inguruko musika-eskolak ezagutzeko eta beraiekiko harremana estutzeko. Musika-eskola bana ezagutu izan du urtero denbora-tarte honetan, eta, eskolaren 25. urteurrenean, aparteko izaeraz, Goierriko musika-eskolen arteko lehenengo topaketa egin zuen gainera.

Seguran martxoaren 22an jaialdia egingo da Korrika datorrela girotzeko, eta hantxe izango dira TOBERA Musika-eskolako ikasleak, musika jarriz, ekarpena egiten (18:30, plazan jarritako karpan). Egun horretarako prestatutako kanten artean, aurtengo Korrikaren kanta ofizialaren moldaketa dago, txistuko eta gitarrako ikasleen eskutik. Ikus egitarua osorik beheko estekan.

Parekidetasuna lortze-bidean ekarpena egingo dute Segurako herritarrek igandean, martxoaren 8an bertan, Segurako Udalak deituta. Aldarrikatze-ekintza izango da oraingoan. Elkarretaratzea egingo dute eguerdian, plazan, emakumea gutxiesten duten praktikak alboratzeko bisibilizazio-ekimen modura. Eta, osagaien artean, hantxe izango dira TOBERA Musika-eskolako ikasleak ere, musikaz mezu bera helarazten. Eta, gainera, adibide praktikoa plazaratuta: emakumezko ikasleen lana da, batez ere, erakutsiko duena musika-eskolak. Ikus egitaraua behealdean.

Francisco Escudero MKPko ate irekien astea:

Martxoaren 23tik 27ra Donostiako Kontserbatorioan egingo den ate irekien jardunaldien informazioa duzue atxikian. Ikasleentzat interesgarria izan liteke asteazkenean, 25, 18,00etan emango duten Musika-irakaskuntza profesionalei buruzko informazio-hitzaldia. Ezer argitu nahi duenak, eskura du TOBERA bera nahiz  Francisco Escudero Kontserbatorioa: jefedeestudios@conservatorioescudero.org

28. ikasturtea du aurtengoa Tobera Musika-eskolak. Funtzionamendu-araudia berritzeaz gain, Batzar Orokorrak aurreko kurtsoaren balorazioa eta aurtengoaren kudeaketa-plangintza aho batez onartu ditu.

Martxoa bete-bete etorriko zaigu TOBERA Musika-eskolara. Herri-izaerako saioak, instrumentu ugariren entzunaldiak, ate irekiko jardunaldiak, kontzertuak eta dantza-ikastaroa daude ekintzen artean. Atxikian duzuen eranskinean ikusiko duzue egitarau osoa. Duela bi ikasturte Musikaren Astea antolatu eta gero, iaz Musikaren Hilabetea egin zuen musika-eskolak. Aurten, aldiz, askotariko ekintzak martxoaren 8aren eta 26aren artean kontzentratu nahi izan ditu, ia egunero, herritarrek eta ikasleek TOBERAn eskuragarri duten eskaintza zabalaren inguruko zuzeneko informazioa jaso ahal izan dezaten.

Dantza tradizionalak ikasiko dira (hasierako mailatik): fandangoa, arin-arina eta beste (partaideen aurreratze-erritmoaren eta gustuen arabera).

13 saio martxoa eta ekaina bitartean (4 hilabete). Saio informalak izango dira; herritarrek herritarrei eskainitakoak. TOBERAko zenbait dantza-ikasle eta irakaslea izango dira gidari, eta bakoitzaren premietara moldatuta.

Larunbatetan eguerdiko 12etatik aurrera.

Ordubeteko saioak.

18 urtetik gorako gazteentzat zein helduentzat.

Dantza-ezagutza oinarrizkoak izan ala ez.

Interesatuak oro har.

10 edizio beteko ditu aurten Andoaingo piano-jaialdiak. Antolatu zen aurreneko ediziotik bertatik, partaideen artean izan dira TOBERA Musika-eskolako ikasleak, eta, maiz, emaitza bikainak eskuratuta itzuli dira handik. Aurten, 2015eko otsailaren 27 eta 28an eta martxoaren 1ean zehar izango dira jaialdiko entzunaldiak eta sariak banatzeko ekitaldiak. Horren guztiaren osagarri, gainera, Andoaingo Bastero Kulturgunean bertan, kontzertuak izango dira (pianoaz gain, baita bestelako musika-tresnekin ere), asteburu betea eskaintzeko hala nahi duen edonori musikaren inguruan.

EspresART en otra dimensión izeneko gunea atondu zuten Zurriolako pasealekuan abenduaren 13an, larunbata, 450 metro koadroko karpapean. Arteari eskainita egon zen, eta, tartean, musikak ere protagonismo berezia hartu zuen, TOBERA Musika-eskolako ikasleen eskutik. Hain zuzen ere, musikaren ardura oso-osorik TOBERArena izan zen ekitaldian, eta kartoizko kaxekin atondutako agertokian, 2 saio eman zituen musika-eskolak. 4 bloketan banatutako kontzertua izan zen: lehenengoan, euskal dantzak izan ziren nagusi, eta soka-dantzaren eta Agurraren inguruko azalpen didaktikoak eskini ziren.