Blogak

Musika-eskola ugari ezagutu ditu TOBERA Musika-eskolak elkartruke-zikloa egiteari ekin zionetik. 2001/2002 ikasturtean egin zuen aurreneko elkartrukea, eta, harrezkero, Gipuzkoako eta Nafarroako musika-eskolak ezagutzen dihardu, Goierriko eskolak ezagutzen hasi eta gero. Aurten Lasarterako bidea hartuko dute TOBERAko ikasleek. Martxoaren 30ean Lasarte-Oriako Manuel Lekuona kultura-etxeko auditorioan arratsaldeko 18:30ean egingo den kontzertura TOBERAko 60 lagun joango dira.

Udaberriari ongi etorria musikaz emango dio TOBERA Musika-eskolak, nola bestela!

Martxoko azkeneko astea eta apirileko aurrenekoa Musikaren Hamabostaldia ospatzeko datak izango dira. Aste Santuko oporraldira jauzi egin aurretik, hala, hamaika aitzaki izango dituzte TOBERAko ikasleek eta herritarrek musikaz gozatzeko.

Francisco Escudero kontserbatoriora sartzeko gogoa baduzu, “Ate irekien astean” hurbil zaitez bertara (Donostia).
NOIZ: 2017ko martxoaren 20tik 24ra.
IZEN-EMATEA: 2017ko martxoaren 1etik 15era.
- E-mailez: oficina@conservatorioescudero.eus
- Telefonoz: 943466488, astelehenetik ostiralera 9,30etik 13,00etara.

Otsailaren 21ean Zegamako Jabier Otaegi kultura-etxean egingo du Gurasoen Batzar Orokorra Tobera Musika-eskolak, arratsaldeko 19:30ean. Zuzendaritza-batzordeko kide berriak izendatuko dira bilera horretan ofizialki: Garazi Mendizabal Amundarain idazkari berria izango da, Oihana Prieto Murgiondo lehendakariorde, Begotxu Telleria Etxezarreta dantzako jantziez arduratuko da, eta Gurutze Azurmendi Irastorza eta Egoitz Berasategi Gerriko eledunak izango dira.

Otsailaren 4an eta 5ean, Andoaingo Bastero kulturgunea pianoaren erresuma bilakatu zen. Hantxe elkartu ziren 18 urtez azpiko ia 800 piano-ikasle, Tobera Musika-eskolako 11 lagun tartean zirela. Orain arte egindako edizio guztietan hartu izan dute parte Tobera Musika-eskolako ikasleek jaialdi entzutetsu horretan.

Euskal Herriko Goi-mailako Musika-ikastegia den Musikenek Pedagogia espezialitatea aurkeztuko du laster. Otsailaren 7an izango da aurkezpen-saio hori, arratsaldeko 17:15ean, Donostiako Francisco Escudero Kontserbatorioan. Espezialitate horren aurkezpen-saioaren iraupena ordu batekoa izango da, eta gonbidatuta zaudete ikasle eta interesatu guztiok.

Urteroko usadioa da aspaldi honetan. Eta aurten ere ez du hutsik egin hitzorduak. TOBERA Musika-eskolaren eskutik iritsi dira Hiru Errege Magoak Zegamara, opariak partitzera herritarren artean, urtean zehar izan dugun portaeraren eta jarreraren proportzioan. Urteak dira harrera-ospakizuna antolatzea musika-eskolaren ardura dela, eta segizioak txistularien musika izan ohi du lagun, baita aurten ere (ikus argazkian guztiak elkarrekin, elizan egindako amaierako saioan).

Zegamako 3 familia-ordezkari eta Segurako, Zeraingo, Mutiloako eta gainerako herrietako ikasleen beste 2 ordezkatzera doa laster TOBERA Musika-eskola. TOBERA Musika-eskolaren Zuzendaritza-batzordeko kide berriak izendatzeko, hauteskundeetara deitu dira bertako bazkide guztiak. Hauteskundeak abenduaren 20an egingo dira, asteartea, arratsaldeko 18:00 eta 20:00 bitarte Zegamako Jabier Otaegi kultura-etxean eta Segurako kultura-etxean (musika-eskolaren egoitzan), bietan aldi berean.

Orkli berokuntzarako, etxeko ur berorako, ur-beroketarako eta etxetresna elektrikoetarako osagaiak fabrikatzen eta saltzen dituen enpresa da, eta bere egoitza soziala Ordizian dago. Zegamako, Segurako, Zeraingo eta Mutiloako TOBERA Musika-eskolak herriotan musikaren arloan egiten duen kultura- eta gizarte-jarduera aintzat hartuta, kooperatibako Kontseilu Sozialak gure ikastegiari diru-laguntza ematea erabaki du beste behin.

Santa Zezilia egunez ez du jai hartuko TOBERA Musika-eskolak. Musikarion eguna lanean emango du TOBERAk. Gustura, ordea.