Blogak

Ampo balbulak fabrikatzen eta saltzen dituen kooperatiba da, eta bere egoitza soziala Idiazabalen dago. Hortik gertu, Zegamako, Segurako, Zeraingo eta Mutiloako TOBERA Musika-eskolak 4 herri horietan musikaren arloan egiten duen kultura- eta gizarte-jarduera aintzat hartuta, kooperatibako Kontseilu Sozialak gure ikastegiari diru-laguntza ematea erabaki du aurten bosgarren urtez.

Apirilaren 7an izan da aurtengo Dantzari Txiki Eguna Zegaman. Eguraldiak lagunduta, eguneko aurreikuspenak bete ahal izan dira, eta jai koloretsua osatu dute Lazkaoko Oin Arin dantza-taldekoek, Segurako Azpilla dantza-taldekoek, Beasaingo Aurtzaka dantza-taldekoek eta Zegamako bertako TOBERAko 5 dantza-taldeetako partaideek. Talde bakoitzak bere musikariak izan ditu lagun, eta eurak ikustera eta entzutera gerturatutako herritarrak, senitartekoak eta lagunak ugari izan dira. Beraz, festa-egun handia izan da dantzari txikiek osatutakoa Zegaman igandean. Eskerrik asko guztioi!

Musikaren Hamabostaldia herriak kulturaz eta musikaz blaitzera etorri da aurten. TOBERA Musika-eskolak antolatutako ekintza-sorta oparoak herritarren arteko loturak eratzeko balio izan du, eta gogoratzeko moduko hainbat une ari da uzten. Jarraian doan estekan zenbait ekintzatako argazkiak ikusi eta deskargatu ahal izango dituzue, ez ahaztu, dena den, oraindik ere badela zertaz gozatua Musikaren Hamabostaldiarekin.

https://photos.google.com/album/AF1QipPwgPn_rmu2mi5p5ruMAkGhP--rJihwjPoV...

Bihar Aguraingo Zortziko Udal Musika-eskolako ikasleak izango dira bisitan Seguran. Arratsaldeko 18:30ean kontzertu bateratua emango dugu bi musika-eskoletako ikasleek Botikaxahar kulturgunean, Manex Rivela eta Laia Apaolaza ikasle segurarrek aurkeztuta. Hala, aurreko asteazkenean Toberakoek Agurainen arrakastaz jotako emanaldia ‘bueltatuko’ digute arabarrek. Agurainera 50 lagun baino gehiago joan ginen. Harrera zoragarria egin ziguten; eskerrik asko, beraz! Seguran elkarrekin eskainiko dugun kontzertuaren egitaraua albiste honen behealdean duzue.

Martxoaren bukaeran eta apirilaren hasieran Musikaren Hamabostaldia egingo du TOBERA Musika- eta Dantza-eskolak. Zegama, Segura, Zerain eta Mutiloa herri 'bizi-biziak' direla ezin da ukatu. Herritarrek eta herriko elkarteek egiten dituzte bizi. Bizitasunari, eutsi bakarrik ez, bultz egin behar zaio. Eta, asmo horrekin, Musikaren Hamabostaldia pentsatu eta antolatu du TOBERAk, herri-bizitza hauspotzeko ekarpen modura. Lankidetzan osatu du TOBERAk musika-programazioa; herria bizkortzen prozesutik bertatik hasi beharra baitago. Atzeak erakusten duelako aurrea nola dantzatu.

Sustraitua dute Zegamako herritarrek Santa Ageda bezperako koplak kalez kale abesteko ohitura. Ohitura berritu dute 2019an ere, beste urte batez, eta jendetza gerturatu da hitzordura. Azkeneko urteotan izan den moduan, aurtengoan ere, ez dute hutsik egin TOBERA Musika-eskolako ikasleek. Txistuko eta euskal dantzatako ikasleak izan dira ardura hori izan dutenak. Hasi iluntzeko 7etan eta amaitu Kasino elkartean afari-merienda eginda, plan betea izan dute herritarrek. Lurrari esnatzeko deia egin diote makilak jota. Baietz lurrak deiari erreparatu! Beste urte batez.

2019. urteko otsailean, martxoan, eta apirilaren hasieran Musikene ikastegian irakasten diren espezialitateei buruzko ate irekien hainbat jardunaldi egingo dira.

Jardunaldi horien helburu nagusia Musikeneko irakaskuntza zuzenean ezagutzea da, espezialitateetako irakasleak zeintzuk diren eta nola irakasten duten, sarrera-probaren ezaugarriak zeintzuk diren, ikasleei eskaintzen zaizkien jarduera osagarriak, eta bertaratzen direnek luzatu nahi duten bestelako edozein kontsulta, hain zuzen ere.

Urtarrilaren 31n, osteguna, arratsaldeko 18:00etatik 20:00etara, TOBERA Musika-eskolako Zuzendaritza-batzordean aurrerantzean ordezkari izango diren familiak hautatzeko Hauteskundeak egingo dira. Zegamako hiru guraso/tutore edo adin nagusiko ikasle hautatu behar dira, eta beste bi Seguratik, Zeraindik, Mutiloatik eta gainerako herrietatik. Horiek, Zuzendaritzan jarraituko duten familia-ordezkariekin, udal zinegotziekin eta eskolako zuzendariarekin batera, musika-eskolako erabaki-organo horretako kide izatera pasatuko dira.

Otsailaren 16an eta 17an 14. piano-jaialdia egingo da Andoainen. Hasieratik hartu izan du parte bertan TOBERA Musika-eskolak. Aurten ere halaxe izango da. Honako ikasle-taldea da lana gogor eta gogotsu egiten ari dena asteburu horretan onena emateko:

Bakarlari modura, A mailan, Paule Galdos ariko da. B mailan Naiara Iraola, Nahia Lizarribar, Malen Otaegi, Laia Apaolaza eta Uxue Areizaga. C mailan, Eider Matías. 4 eskutara, berriz, B mailan, Maier Albizu eta Irati Urbizu lehiatuko dira, eta, C mailan, Irati Goiburu eta Irati Arrizkorreta.