Blogak

Martxoaren bukaeran eta apirilaren hasieran Musikaren Hamabostaldia egingo du TOBERA Musika- eta Dantza-eskolak. Zegama, Segura, Zerain eta Mutiloa herri 'bizi-biziak' direla ezin da ukatu. Herritarrek eta herriko elkarteek egiten dituzte bizi. Bizitasunari, eutsi bakarrik ez, bultz egin behar zaio. Eta, asmo horrekin, Musikaren Hamabostaldia pentsatu eta antolatu du TOBERAk, herri-bizitza hauspotzeko ekarpen modura. Lankidetzan osatu du TOBERAk musika-programazioa; herria bizkortzen prozesutik bertatik hasi beharra baitago. Atzeak erakusten duelako aurrea nola dantzatu.

Sustraitua dute Zegamako herritarrek Santa Ageda bezperako koplak kalez kale abesteko ohitura. Ohitura berritu dute 2019an ere, beste urte batez, eta jendetza gerturatu da hitzordura. Azkeneko urteotan izan den moduan, aurtengoan ere, ez dute hutsik egin TOBERA Musika-eskolako ikasleek. Txistuko eta euskal dantzatako ikasleak izan dira ardura hori izan dutenak. Hasi iluntzeko 7etan eta amaitu Kasino elkartean afari-merienda eginda, plan betea izan dute herritarrek. Lurrari esnatzeko deia egin diote makilak jota. Baietz lurrak deiari erreparatu! Beste urte batez.

2019. urteko otsailean, martxoan, eta apirilaren hasieran Musikene ikastegian irakasten diren espezialitateei buruzko ate irekien hainbat jardunaldi egingo dira.

Jardunaldi horien helburu nagusia Musikeneko irakaskuntza zuzenean ezagutzea da, espezialitateetako irakasleak zeintzuk diren eta nola irakasten duten, sarrera-probaren ezaugarriak zeintzuk diren, ikasleei eskaintzen zaizkien jarduera osagarriak, eta bertaratzen direnek luzatu nahi duten bestelako edozein kontsulta, hain zuzen ere.

Urtarrilaren 31n, osteguna, arratsaldeko 18:00etatik 20:00etara, TOBERA Musika-eskolako Zuzendaritza-batzordean aurrerantzean ordezkari izango diren familiak hautatzeko Hauteskundeak egingo dira. Zegamako hiru guraso/tutore edo adin nagusiko ikasle hautatu behar dira, eta beste bi Seguratik, Zeraindik, Mutiloatik eta gainerako herrietatik. Horiek, Zuzendaritzan jarraituko duten familia-ordezkariekin, udal zinegotziekin eta eskolako zuzendariarekin batera, musika-eskolako erabaki-organo horretako kide izatera pasatuko dira.

Otsailaren 16an eta 17an 14. piano-jaialdia egingo da Andoainen. Hasieratik hartu izan du parte bertan TOBERA Musika-eskolak. Aurten ere halaxe izango da. Honako ikasle-taldea da lana gogor eta gogotsu egiten ari dena asteburu horretan onena emateko:

Bakarlari modura, A mailan, Paule Galdos ariko da. B mailan Naiara Iraola, Nahia Lizarribar, Malen Otaegi, Laia Apaolaza eta Uxue Areizaga. C mailan, Eider Matías. 4 eskutara, berriz, B mailan, Maier Albizu eta Irati Urbizu lehiatuko dira, eta, C mailan, Irati Goiburu eta Irati Arrizkorreta.

Orkli berokuntzarako, etxeko ur berorako, ur-beroketarako eta etxetresna elektrikoetarako osagaiak fabrikatzen eta saltzen dituen enpresa da, eta bere egoitza soziala Ordizian dago.  TOBERA Musika-eskolak Zegaman, Seguran, Zerainen eta Mutiloan musikaren eta euskal dantzen arloan egiten duen kultura- eta gizarte-jarduera aintzat hartuta, aipatu kooperatibako K

Musikarien zaindari Santa Zeziliaren eguna ez du aurten jai hartuko TOBERA Musika- eta Dantza-eskolak. Japoniarrek bezala (diotenez) ospatuko dugu: lanean. Lan gustagarria izango da, ordea, egun horretakoa. Izan ere, arratsaldean, eskolak bertan behera utzi, eta behar bezala goratuko dugu musikarekin lotutako santua. Hain zuzen ere, trikitiko, panderoko eta perkusioko ikasleek Zegamako plazan hasitako kalejira batekin ekingo diogu eguna girotzeari, eta, gero, arratsaldeko 18:30ean hasita, kontzertua eskainiko dute eskolako ikasleek Zegamako eskolako gimnasioan.

Zer lantzen da Musika-hizkuntzako eskoletan? …nola transmititzen dira kontzeptuak? …zertan eta nola lagun diezaieket seme-alabei?  Horiek izango dira, akaso, TOBERAn izena eman duten ikasleen zenbait familiak izango dituzten galderak.

Musika-hizkuntza ikastea musika-hezkuntzaren oinarria da. Musika-hizkuntzan ikasten dutenari esker eraikitzen dute gero ikasleek beren abilezia musika-tresna bat jotzen, abesten, taldean interpretatzen, erritmoa eta mugimendua jarraitzen, partitura bat deszifratzen eta sentitzen, konposatzen…