zegama

Musikarien zaindari Santa Zeziliaren eguna ez du aurten jai hartuko TOBERA Musika- eta Dantza-eskolak. Japoniarrek bezala (diotenez) ospatuko dugu: lanean. Lan gustagarria izango da, ordea, egun horretakoa. Izan ere, arratsaldean, eskolak bertan behera utzi, eta behar bezala goratuko dugu musikarekin lotutako santua. Hain zuzen ere, trikitiko, panderoko eta perkusioko ikasleek Zegamako plazan hasitako kalejira batekin ekingo diogu eguna girotzeari, eta, gero, arratsaldeko 18:30ean hasita, kontzertua eskainiko dute eskolako ikasleek Zegamako eskolako gimnasioan.

IKUSI ARGAZKIAK HEMEN: https://photos.app.goo.gl/kg4X7xwoVimQU9ae6

2018/2019 ikasturtean instrumentua aukeratzea egokituko zaien ikasleek TOBERA Musika-ewskolan irakasten diren musika-tresnak ezagutu dituzte bertatik bertara egunotan. Musika-hizkuntzako eskoletan ikasiak dituzte dagoeneko instrumentu desberdinak, beren ezaugarriak eta sonoritatea. Seguran eta Zegaman martxoan egindako entzunaldietan ere izan dute horretarako aukera.

Musikaz betetako astelehena izan zuten Asparreneko Udal Musika-eskolako ikasleek eta TOBERAkoek. Elkartrukearen barruan, apirilaren 16an Zegamako gimnasioan egindako kontzertua izan zen aurrenekoa, eta maiatzaren 29an izango da bigarrena. Bigarren emanaldi hori Araian izango da, eta, kasu horretan ere, elkarrekin joko dute bi musika-eskoletako ikasleek.

Datorren astelehenean, apirilaren 16an, aurtengo Elkartrukearen lehenengo saioa izango dugu, Zegaman. Asparreneko Udal Musika-eskola izango dugu bisitari egun horretan, arratsaldeko 18:30ean eskolako gimnasioan hasiko den kontzertuan. Asparrena Arabako Aguraingo Eskualdeko udalerria da; 10 herrik osatzen dute, eta Araia du udalburu.

Hemen behean duzue kontzertuaren egitaraua. Bukaeran, merienda izango da partaideentzat.

Urteak dira TOBERA Musika-eskolak instrumentuen entzunaldiak eta musika-hizkuntzako ate irekiak egiten dituela. Pare bat astean, gure musika-eskolako ate-leihoak zabaltzen dizkiegu herritarrei, egiten dugun lana gertuagotik ezagut dezaten. Hemen behean duzue 2018ko egitaraua.

Idiazabalen urtarrilaren 27an egin zen Txistu-alardean TOBERAtik joandako partaideetako batentzat, Lorearentzat, aurreneko aldia izan zen Alarde batean, eta gustura asko itzuli zen etxera ikusitakoarekin eta entzundakoarekin. Esperientzia bikaina, berarentzat ezezik, TOBERAtik joandako 4 ikasleentzat eta beren irakaslearentzat.

Horretaz gain, Santa Agedaren bezperako koplatan irten ziren TOBERAko trikitilariak eta txistulariak aurreko igandean Zegaman, eguraldi txarrari muzin eginda. 15 ikasleko taldea ibili zen kalez kale herritarrak laguntzen.

Ikusi Segurako eta Zegamako argazki-albumak, hemen: https://goo.gl/photos/qJSdjuf6d5Jy7sjF6

30. ikasturtea amaitzear du TOBERA Musika-eskolak. Honezkero, eginak dituzte izen-emateak hurrengo ikasturterako ikasleek, eta TOBERA hasi da prestatzen irailean hasiko duen ikasturte berria.

Lazkaoko Oin-Arin Dantza-taldeko kideak eta Beasaingo Aurtzaka Dantza-taldekoak izan ditugu TOBERAn bisitari aurtengo Dantzari Txiki Egunean; guztira, 125 dantzari eta musikari. Dantzaririk gazteenak ekarri ditu talde bakoitzak Zegamara, eta 'benetako' dantzari 'txiki' eguna izan da egindakoa, beraz.

Eguneko argazki batzuk ikusteko, sartu hemen: https://goo.gl/photos/EqUziay5txSCYHM29

Udaberriari ongi etorria musikaz emango dio TOBERA Musika-eskolak, nola bestela!

Martxoko azkeneko astea eta apirileko aurrenekoa Musikaren Hamabostaldia ospatzeko datak izango dira. Aste Santuko oporraldira jauzi egin aurretik, hala, hamaika aitzaki izango dituzte TOBERAko ikasleek eta herritarrek musikaz gozatzeko.